Sigmundur löðrungar eingetna dóttur sína

Hafi einhver búist við því að Ástþór Magnússon yrði skrípamynd kvöldsins, þá skjátlaðist honum, því sá vafasami heiður féll í skaut Karli V. Matthíassyni, sem talaði fyrir Frjálslynda. Karl er nýgenginn í Frjálslynda flokkinn. Samfylkingin er nýbúin að fleygja honum á öskuhaug stjórnmálanna og þar hefði hann betur haldið sig. Honum tókst að vekja almenn aðhlátur í salnum með þreytandi málæði sem stýrurnar tvær reyndu þó eftir fremsta megni að stöðva.

Stjórnmálaflokkarnir eru búnir að leiða í lög reglur um styrki og bókhald, þeir verða líka að setja sér óformlegar reglur um flokkaflakkara. Sú óvirðing sem kjósendum og Alþingi er sýnd með því að hirða upp ruslið af öskuhaug annarra flokka og troða því  í framboð hjá sér er forkastanleg – hana verður að stöðva.                                                                                                        

Þráinn Bertelsson nennti ekki að tala um atvinnumál og niðurskurð en hefði áreiðanlega orðið liðtækur stjórnmálamaður ef hann hefði farið út á þann veg fyrir 20-30 árum. 

 Illugi Gunnarsson var augsýnilega þrúgaður af því andrúmslofti uppgjafar og trotryggni sem ríkt hefur í Valhöll. Það vantaði í hann þann gneista og æskuþrótt sem hefur einkennt hann á liðnum árum. Hann komst þó afar vel frá sínu og svör hans sýndu berlega hve vel hann skilur atvinnulíf og það umhverfi sem stjórnmálamenn þurfa að skapa fyrir rekstur. Stjórnmálamenn skapa ekki störf, sagði Illugi, en þeir geta skapað þannig umhverfi að rekstur dafni og störf verði til.

Fulltrúar ríkisstjórnarinnar, þau Helgi Hjörvar og Katrín Júlíusdóttir (breytist í : Jakobsdóttir, sjá athugasemd) mættu bæði til leiks gallhörð í þeim einlæga ásetningi að svara nákvæmlega engu til um atvinnulíf og niðurskurð. Þau svöruðu með almennum klisjum og fjösuðu fjálglega um allt annað en það sem um var spurt. Hvers vegna? Líklega vegna þess að þau hafa ekki hugmynd um hvað ríkisstjórnin mun gera eftir kosningar – og það er hér um bil öruggt að það veit enginn.

En til hvers ættu þau líka að svara? Samfylking og Vinstri græn mælast með 60% í skoðanakönnunum og þeirra herfræði núna byggist á þeirri einföldu reglu að þrauka næstu 11 daga án þess að svara nokkrum sköpuðum hlut – því heiðarleg svör gætu aðeins komið þeim illa

Sigmundur Davíð er búinn að lita hárið svart og það gerir hann hvassari ásýndum. Þetta var erfitt kvöld fyrir hann – nýjasta könnun sýnir að hann er úti. Hann fór hörðum orðum um ríkisstjórnina sem ekkert gerir og svíkst um allt sem hún hafði lofað – þetta voru hans eigin orð. En þessi ríkisstjórn er hans eingetna dóttir og hver löðrungur sem henni er réttur er löðrungur greiddur Sigmundi sjálfum.

Þetta var daufur þáttur og miklu síðri en fjörþátturinn að vestan. 

Kempan er á útleið

Björn Bjarnason hittir naglann á höfuðið eins og fyrri daginn. Það er fyrir neðan allar hellur að Alþingi skuli hunsa þá ábyrgð sem á því hvílir að setja þjóðinni stjórnarskrá. Það er fráleitt að efna til einhvers konar annars flokks Alþingis til að vinna það starf.

Framganga Björns í þessu máli er honum og flokknum til sóma - en minnir okkur jafnframt á hvílík kempa er á útleið úr sölum þingsins í næstu kosningum.

Stefnir í sigur „málþófsins“

Leið kristnu píslarvottunum svona?

Frambjóðendur Sjálfstæðisflokksins eru ekki öfundsverðir þessa dagana. Þjóðin fussar við þeim. Þeir eru eins og fótboltamenn sem ganga út úr búningsherbergjunum til að hefja seinni hálfleik og staðan er 8 - 0, andstæðingunum í vil.

Leið kristnu píslarvottunum svona þegar þeim var fleygt fyrir ljónin? Ég dáist að þessum mönnum. Þeir eru lítilmagnarnir. Og ég er hreykinn af hugrekki þeirra. Hjarta mitt slær fyrir þá.

Samfylking stærst

Pólitísk leifturárás sem heppnaðist vel

Þessir styrkir voru á engan hátt vafasamir. Þeir voru löglegir og þeir voru siðlegir. En það er kosningabarátta og bæði fjölmiðlar og pólitískir andstæðingar Sjálfstæðisflokksins hafa gernýtt þetta mál til þess að strýkja hans magra búk. Við því er ekkert að segja. Svona gengur pólitíkin fyrir sig.

Verra er hvernig Sjálfstæðismenn hafa sjálfir brugðist við þessari pólitísku leifturárás. Í stað þess að hreykja sér stoltir af þeirri vinsemd sem þeim var sýnd hafa þeir bent hver á annan og látið eins og það væri saknæmt að þiggja liðveislu. Ég mun hugsa mig um tvisvar áður en ég sletti 1000 kalli í kosningasjóðinn. Ég yrði trúlega sakaður um mútur.

Erla Ósk: Ekki endilega vafasamt athæfi

Eru Sjálfstæðismenn að fara á taugum?

Hver sagði hvað og hvenær og hversvegna - og hvernig kom hann orðum að því? Eru Sjálfstæðismenn að ganga af göflunum? Þeir eru farnir að taka þátt af fullum krafti í bjánalega krimmaleiknum sem  fjölmiðlar spunnu upp í gúrkutíðinni fyrir páska.

Það var nákvæmlega ekkert því til fyrirstöðu að þiggja þessa rausnarlegu styrki frá tveim ágætis fyrirtækjum. Lög sem takmörkuðu slíkar fjárgjafir voru sett síðar.

Fyrir nokkrum áratugum var hægri umferð lögleidd á Íslandi. Fram að þeim degi - fram að þeirri klukkustund og þeirri sekúndu - ríktu hér lög um vinstri umferð. Þeir sem óku á vinstra kanti fyrir breytinguna þurfa ekki að sæta viðurlögum núna.

Er þetta svo hræðilega flókið? Ég trúi því varla að Sjálfstæðisflokkurinn ætli að skila peningum sem góðviljaðir menn gáfu honum. Ég trúi því ekki að óreyndu að Sjálfstæðisflokkurinn fari á taugum.

Fylgdu einhver undirmál þessum fjárframlögum? Það hefur ekkert komið fram sem bendir til þess. Hafi FL gert sér einhverjar vonir um sérstaka fyrirgreiðslu þá varð alla vega aldrei neitt úr neinu slíku, og heldur finnst mér vafasamt að áfellast menn fyrir hugrenningar - hversu ókræsilegar sem þær kunna að hafa verið.

Fráleitt að draga nafn Kjartans inn í atburðarásina

Tanga-Tómas kallar óumræðilegar lystisemdir.....

Sjálfstæðisflokknum veitti ekkert af 55 milljónum og hann var vel að þeim kominn. Við skulum safna saman nokkrum milljónum núna því hann er blankur aftur.

Í dag fór ég með Jónu minni suður á Selatanga að heimsækja vin minn, Tanga-Tómas, sem þar hírist einn í hrörlegum verbúðum og fiskbyrgjum. Hann er líka kallaður Móri.  Norðannæðingur lék um þessa fornu sjávarborg. Andar framliðinna létu lítt á sér kræla í vorkuldanum.

Hvert eigum við að fara til að leita upprunans? Farðu ekki á Þingvöll, því þar er bara uppruni skrifræðis og miðstýringar. Farðu á Selatanga, þar sem forfeður okkar fórnuðu lífinu fyrir okkur sem nú lifum. Fyrst gengu þeir þvert yfir landið, svo reru þeir til fiskjar, svo gengu þeir heim aftur - þeir sem ekki týndu lífinu í þungum sjó og illum veðrum.

En það sem við köllum kreppu, það kallar Tanga-Tómas óumræðilegar lystisemdir.

Allt komið fram sem máli skiptir

Sjálfstæðisflokkur í hressandi stálbaði

Enginn Íslendingur hefur tekið formennsku í stjórnmálaflokki við jafn erfiðar aðstæður og Bjarni Benediktsson yngri. Gríðarlegt fylgishrun – og síðan umdeildur fjárstyrkur frá fyrirtækjum.

Höfum strax eitt á hreinu, Sjálfstæðismenn: það var nákvæmlega ekkert að því að þiggja þessa fjárstyrki á sínum tíma. Það var ekki ólöglegt og ekki siðlaust. Lög sem núna gilda um slíka styrki höfðu ekki tekið gildi. Það breytir engu að þau voru í þann mund að taka gildi – sú stund var ekki upp runnin þegar peningarnir bárust. 

Fyrir allnokkrum árum var um það skrifað í fjölmiðlum að gamall maður hefði arfleitt Alþýðubandalagið að húsi sínu. Þetta þótti öllum fagurt. Það er líka fagurt þegar stöndug fyrirtæki styrkja Sjálfstæðisflokkinn.

Gleymum því ekki að Sjálfstæðisflokkurinn hefur lagt grunninn að heilbrigðu og öflugu atvinnulífi á Íslandi. Án Sjálfstæðisflokksins væru engin fyrirtæki stöndug í landinu. Hér væri bara örbirgð. Það er ekki nema sjálfsagt að fyrirtæki styrki hann þegar hart er í ári. Gleymum því ekki heldur að á þessum tíma jusu bankar og önnur fyrirtæki milljörðum króna í íþróttir og menningu. 50 milljónir var ekki tiltakanlega há fjárhæð fyrir þessi risafyrirtæki.

Var rangt að þiggja þessa peninga?  Hreint ekki. Það má alveg eins spyrja: hefði Alþýðubandalagið átt að hafna húsi gamla mannsins? Auðvitað var nákvæmlega ekkert rangt við að þiggja þessa peninga. Ef ég á eftir að eignast risafyrirtæki ætla ég að styðja Sjálfstæðisflokkinn um 50 – 100 milljónir króna og ég mun þá taka það óstinnt upp ef hann segir nei takk.

Á Sjálfstæðisflokkurinn að skila þessum peningum? Alls ekki. Hann fékk þá með algerlega heiðarlegum, löglegum og siðsamlegum hætti og það er engin ástæða til að skila þeim. Það getur vel verið að einhverjum þyki betur hæfa að skila þeim, en það mun nákvæmlega engu breyta – hvorki um það sem hefur gerst, né heldur um afstöðu kjósenda í komandi kosningum.

Sjálfstæðisflokkurinn sér fram á ferlegt afhroð eftir tvær vikur. Öll spjót standa á okkur. Engum þykir vænt um okkur. Það vill okkur enginn.  Það verður sett á okkur nálgunarbann í stjórnarráðinu næstu 4 árin. Okkur gefst því góður tími til að endurskipulegga flokkinn og fullgera þá endurnýjum sem nú er vel á veg komin.

Við skulum hverfa til upphafsins og rifja upp til hvers þessi flokkur var stofnaður á sínum tíma.

Sjálfstæðisflokkurinn er í hressandi stálbaði og mun í fyllingu tímans stíga úr því ferskur og endurnærður.  

Söfnuðu fé fyrir flokkinn

Bjarni Ben er höfði hærri en allur lýður

Um Bjarna Benediktsson mætti segja eins og Sál konung forðum: fyrirmannlegur, fríður og höfði hærri en allur lýður. Hann vex að styrk með degi hverjum og var í sjónvarpsþætti kvöldsins höfði hærri en aðrir sem fyrir svörum sátu. 30 milljón króna styrkurinn frá FL var þungur prófsteinn en Bjarni leysti þá raun með glæsibrag, svaraði af heiðarleika og drengskap og hreinsaði Sjálfstæðisflokkinn algerlega af allri tortryggni hvað þetta mál varðar. Það var áberandi hvað talsmenn Samfylkingar og Framsóknarflokks urðu flóttalegir þegar þetta mál var rætt og aðspurð hvort þeirra flokkar myndu bregðast við af sama drengskap og Bjarni, fóru þau undan í flæmingi. Bjarni fær 9,0 sem er ágætiseinkunn.

Siv Friðleifsdóttir stendur sig alltaf vel í sjónvarpi, áheyrileg, falleg og aðlaðandi kona, glæsilega klædd og ágætlega máli farin. Hún fær 8,0.

Árni Páll Árnason er einskonar sambland af Mikka ref og pólitískri Freyjukaramellu, sólbrúnn myndarmaður sem þræðir einstigin fimlega og læðist svo lítið ber framhjá öllum keldum. Hann ber ekki ennþá mikið skynbragð á efnahagsmál og Bjarni hankaði hann léttilega á ýmsum óheppilegum rangfærslum. Árni fær 7,0.

Valgeir Skagfjörð er frambjóðandi Borgarahreyfingarinnar og sá sem mest kom á óvart í kvöld. Hann er gríðarlegur ásýndum, flugmælskur, talar jafnt með munni, höndum og fótum og komist hann á þing má heita að Spaugstofunni verði vel borgið næsta vetur. Hann skortir ennþá grundvallarþekkingu á flestum þeim málum sem Alþingi varðar, en hann er fljótskarpur og yrði vafalaust ekki lengi að tileinka sér hana. Hann fær 6,0.

Falleinkunn kvöldsins neyðist ég til að gefa Guðfríði Lilju sem er efst á lista Vinstri grænna. Það er mér þung raun að hvetja vinstri menn í kjördæminu til að kjósa fremur Samfylkingu en Vinstri græna. Staðreyndin er bara sú að stjórnmálaflokkur getur ekki boðið upp á frambjóðanda sem er fyrirmunað að útskýra stefnu síns eigin flokks en fjasar í staðinn af heift um aðra flokka. Hún skoraði nokkur stig þegar hún greindi frá bókhaldi flokksins en rann strax á rassinn í helgislepjunni þegar hún varð að játa að Vinstri grænir hefðu þegið framlög frá landsþekktum súlukóngi. Því miður - bullandi falleinkunn.

Um aðra þarf ekki að ræða.

Gríðarlegt fylgishrun herðir oss og styrkir

Þetta er gríðarlegt fylgishrun hjá Sjálfstæðisflokknum. Á stundu sem þessari staldra menn við og tuldra í skeggið: hver er ég, hvaðan kem ég og hvert er ég að fara?

Meðan við hugsum málið harla gneypir skulum við samt ekki gleyma því að betra er að falla með sæmd en lifa við skömm.

Við minnumst líka hins fornkveðna: það sem eigi grandar oss mun aðeins herða oss og styrkja.

VG tvöfaldar fylgið í Kraganum

Sjallarnir unnu!!!!!!

Loksins skildu vinstri fíflin að þeir áttu í höggi við ofjarl sinn. Vinstri flokkarnir hafa nóg af framhleypni, frekju og heimsku en Sjálfstæðismenn búa að meiri vitsmunum og loksins tókst þeim að koma vitinu fyrir kommagerpin.

Svona verður þetta næstu 4 árin. Vinstri menn anandi eins og þöngulhausar út í hverja ófæruna af annarri og Sjallarnir í óða önn að draga þá upp úr - á hárinu!

Byrjað að ræða önnur mál