Framsókn mjakast inn í Samfylkinguna

Sjálfstæðismenn hafa sýnt aðdáunarvert langlundargeð andspænis ofríki og flumbrugangi vinstri flokkanna. Ég hefði ekki trúað því að óreyndu upp á Framsóknarmenn að svíkja lýðræðið jafn herfilega og þeir hafa gert núna. Þeir makka möglunarlaust með kommaflokkunum og undirrita alla þá vitleysu sem frá þeim kemur. Nú mætti leggja þennan flokk niður - eða mjaka honum inn í Samfylkinguna eins og Ómar Ragnarsson gerði við Íslandshreyfinguna þegar hana þraut örendi.

Birgir Ármannsson, Bjarni Benediktsson og fleiri Sjálfstæðismenn hafa staðið lýðræðisvaktina af stakri elju. Þeir uppskera þakkir allra góðra Íslendinga fyrir það.

Sjálfstæðismenn leggja fram sáttatillögu

Skötuhjúin leiða okkur í glötun

Leggjum þessi orð á minnið: ég kann ekki skýringu á því. Þessi orð munu bergmála í sölum Alþingis næstu 4 árin og þau munu bergmála í stjórnarráðinu.

Hvorki Steingrímur né Jóhanna hafa hundsvit á fjármálum. Hvorugt þeirra er fært um að stjórna. Þau hafa enga stjórnunarreynslu né heldur menntun til skilja eðli fjármála. Undir stjórn þeirra mun Ísland sökkva æ dýpra niður í skuldir og örvæntingu. Æskan mun flýja landið. Eftir sitja öldungar og öryrkjar. Skötuhjúin fáfróðu eru fær um það eitt að leiða okkur í glötun. Og þau eru þegar byrjuð á því.

Kann ekki skýringar á veikingu

Hvar eru hraðkvæðu athafnaskáldin?

Það er gott að eiga skáld og vísindamenn, ég tala nú ekki um stórsöngvara og fótboltamenn. En núna ríður á því að þjóðin eigi sér harðduglega athafnamenn. Menn með hugmyndir og kraft til að gera þær að veruleika. Nú á þjóðin líf sitt undir harðfylgi þessara manna.

Hvar sem við sjáum slíkan mann taka til hendi skulum við styðja hann í orði og verki. Okkur er sama hvað hann heitir og hvar hann stendur í pólitík. Við gerum það fyrir börnin okkar og barnabörnin.

Einu sinni bjó Matti Jó til hugtakið athafnaskáld. Nú vantar okkur hraðkvæð athafnaskáld.

Rúmlega helmingur ætlar að ráða í ný störf

Hetjuleg framganga Sjálfstæðismanna

Hetjuleg framganga Sjálfstæðismanna á lýðræðisvaktinni er farin að skila sér. Tilraun vinstri flokkanna til þess að hunsa rétt þingmanna Sjálfstæðismanna er að fara út um þúfur. Vinstri menn verða að læra sína lexíu: Ísland er lýðræðisríki; í lýðræðisríki stökkva menn ekki á stjórnarskrárbreytingar umræðulaust.

Dæmalaust ofbeldi vinstri flokkanna gefur okkur forsmekk að hegðun þeirra næstu 4 árin. Þeir munu ösla fram eins og drukknir birnir og gera hvert axarskaftið af öðru. Hlutverk Sjálfstæðisflokksins í stjórnarandstöðu verður einkum að koma viti fyrir þá og stjórna þannig bak við tjöldin.

Koma til móts við Sjálfstæðisflokk

Hver verða viðbrögð hennar sjálfrar?

Til að skilja viðbrögð Brúns þarf hún fyrst að læra ensku. Ég hef reyndar engan áhuga á viðbrögðum þeirra Brúns og Elsku. Hver verða viðbrögð Jóhönnu og Steingríms? Ég vil vita hver þau verða og það strax.

Vilja viðbrögð frá Brown

Flottir nýliðar fóru á kostum

Sjónvarpsþátturinn frá Vestfjörðum var miklu líflegri en formannaþátturinn á dögunum. Bráðskemmtileg rimma sem nýliðar Sjálfstæðisflokks og Framsóknarflokks unnu með glæsibrag. Þeir fóru á kostum meðan hinir höltruðu utan vega.

 

Gunnar Bragi Sveinsson verður þungaviktarmaður í Framsóknarflokknum. Harður nagli, vel upplýstur, rökfastur og skeleggur. Hann var skýr í svörum og afdráttarlaus. Framsóknarflokkurinn er ekki tilbúinn í banaleguna meðan hann hefur á svona fólki að skipa. Og það er gaman að heyra svona menn ræða málin. Maður fræðist af því að heyra þá tala. Hann fær ágætiseinkunn.

 

Ásbjörn Óttarsson er nýr hjá Sjálfstæðisflokknum og hann er stórkostlegur happafengur. Það er ekki á hverjum degi sem maður fyrirhittir Sjálfstæðismann sem kann bæði að tala og brosa og getur jafnvel gert hvort tveggja í einu. Ásbjörn er garpslegur í framgöngu, broshýr og skemmtilegur. Andstæðingar hans á pallinum gripu fram í fyrir honum og kommarnir í salnum gerðu að honum aðsúg, en hann tók öllu vel og lét ekki slá sig út af laginu. Það er heilsusamlegt að fá svona mótttökur. Þær eru bara til þess fallnar að herða garpinn unga. Framtíðarmaður í Sjálfstæðisflokknum. Ágætiseinkunn.

 

Guðbjartur Hannesson er afar viðkunnanlegur maður og trúlega finnst vinstra fólki notalegt að kjósa hann. Hann hugsar og talar í klisjum eins og vinstri manna er siður. Ber ekkert skynbragð á atvinnulíf og fjármál. Meðaleinkunn.

 

Um aðra frambjóðendur þarf ekki að fjölyrða. Þeir eiga ekkert erindi á Alþing. Þeir fá allir falleinkunn.

Þingfundur hafinn á ný

Við förum líka að skjóta upp rakettum

Vinstri menn í Kóreu eru að skjóta upp rakettum sér til hugarhægðar. Langvarandi hungur fer illa með menn. Þess vegna láta þeir svona. Um árabil hafa þeir étið hver annan. Þeir ættu að láta af vinstri-mennsku og gerast auðvaldssinnar eins og bræður þeirra í Suður-Kóreu. Ef Össur Skarphéðinsson fer að ráðskast með Íslendinga er þess að skammt að bíða að við verðum líka farnir að skjóta upp rakettum okkur til hugarhægðar. Og þá mun Össur aftur lýsa yfir alvarlegum áhyggjum.

Utanríkisráðherra áhyggjufullur

Skemmtilegt áróðursbragð

Vel heppnað og skemmtilegt áróðursbragð.  Kommakerlingin Þóra Kristín beið á staðnum með tökumenn og vélbúnað.  Allt vandlega skipulagt. Fyrirmyndar vinnubrögð. Hæfileg alvara, hæfilegur gáski. Það er gaman þegar fólk nennir að starfa fyrir flokkinn sinn í kosningabaráttunni.

Ráðherra í víking

Ný stétt atvinnu-atvinnuleysingja

Nýlega ræddi sjónvarpsfréttakona við konu úti á landi sem verið hefur á atvinnuleysisbótum í 4 ár. Sjónvarpskonan snökti af meðaumkun. En á þessum 4 árum hafa tugþúsundir útlendinga flykkst til Íslands vegna þess að hér hefur bráðvantað fólk í vinnu. 30 000 útlendingar í vinnu en heimamenn á atvinnuleysisbótum. Halló! Enginn heima?

Við sitjum uppi með hóp atvinnu-atvinnuleysingja. Það þýðir ekkert að þræta fyrir það. Sumir vinna ekki neitt en sumir vinna svart. Langflestir þeirra sem nú misstu atvinnu sína þrá ekkert heitar en að komast aftur í vinnu. Vinnan er lifandi þáttur í sjálfsvirðingu manna. Við tökum þátt, leggjum fram okkar skerf og erum með.

En sumir munu því miður komast upp á lag með að vera á bótum. Þeir vilja ekki fara aftur út á vinnumarkaðinn, vakna eldsnemma á morgnana og koma lúnir heim. Betra að lifa á bótum, hanga heima og horfa á sjónvarpið, fara á kaffihús og knæpur - eða taka leigubíl upp á Akranes og hlusta á Papana, eins og einn atvinnuleysinginn lýsti hér á moggablogginu fyrir nokkrum dögum. Allt eru þetta velþekkt fyrirbæri erlendis og ekki langt síðan frétt birtist um það í blöðunum. Það sama mun gerast hér. Ný stétt atvinnuleysingja eflist með degi hverjum. Og allir kjósa þeir Samfylkingu og Vinstri græna.

 

Færri sækja um laus störf

Mörður fyrirlítur kjósendur

Er Mörður Árnason alveg úti að aka? Þingmenn vilja fylgjast með framboðsfundum vegna þess að eftir tvær vikur eru haldnar Alþingiskosningar. Þingmenn þurfa að vita hvað er sagt, hverju er lofað og hvað er gert. En Mörður líkir þessum framboðsfundum við fótboltaleik eða saumaklúbb. Mörður leyfir sér að sýna kjósendum úti á landi ótrúlega lítilsvirðingu. Sést nú best hvílík firra það er að keyra þingið alveg fram undir það síðasta. Og sést nú best hvað Mörður Árnason er gjörsamlega veruleikafirrtur þingmaður. Það virðist ekki flögra að honum að til séu menn á Íslandi sem enn þá taka lýðræðið alvarlega.

Hlé á þingfundi vegna framboðsfundar?