Vinstri menn klúðra fjármálum

Alltaf sannast það í stóru og smáu að vinstri mönnum er ekki treystandi fyrir fjármálum. Það er ekki aðeins að kommaklíkan í Hafnarfirði hafi steypt okkur sem búum hér í botnlausar skuldir, þeir hafa ekki einu sinni hugsun á því að rukka verktaka um lögboðnar greiðslur upp á 100 milljónir. Réttast væri að þeir sem kusu þessa fábjána til valda tækju á sig skuldirnar og létu okkur hina í friði. Sorglegast af öllu er þó að vinstri mennirnir sem stjórna landinu eru ekki hóti skárri. Þeir eru verri ef eitthvað er. Ef Bjarni Ben og Sigmundur fengju að stýra Íslandi værum við á góðri leið út úr kreppunni og komin á rekspöl með nýtt góðæri.

Hafnarfjörður varð af 93 milljónum króna

Óbótamenn sleppa billega

Þegar almenningur getur ekki lengur treyst réttvísinni neyðast menn til að taka lögin í sínar hendur. Um daginn sagði ung kona frá því að hún hefði fengið vini sína til að misþyrma óþokkanum sem nauðgaði henni. Hún treysti ekki réttvísinni og valdi þessa leið. Og hér segir frá móður sem þarf að horfa upp á forhertan morðingja dóttur sinnar valsa um götur með glott á vör......hann lifir en veslings stúlkan liggur myrt og svívirt  í kaldri gröf.

*

Óbótamenn á Íslandi sleppa alltof billega, það er nú bara staðreynd málsins. Þeir myrða, nauðga, stela og misþyrma og fá væga dóma, jafn vel þótt síbrotamenn séu. Þó keyrir um þvert bak þegar hinum dæmdu óbótamönnum er ekki einu sinni stungið inn til að afplána refsinguna. Þeir ganga um frjálsir þangað til dómurinn fyrnist, þá byrja þeir aftur að nauðga, drepa, stela og misþyrma.

*

Til þess eru ríkisstjórnir að halda uppi lög og reglu. En Jóhanna Sigurðardóttir og Steingrímur yppta öxlum andspænis ofbeldinu. Kannski minnast þau þess að það voru ofbeldismenn sem komu þeim sjálfum að kjötkötlunum. 

*

http://www.pressan.is/Frettir/LesaFrett/eg-vil-ad-mordingi-dottur-minnar-verdi-daemdur-opinberlega---mer-bydur-vid-ad-hann-gangi-laus 

Staðgöngumæðrun - Alþingi steinsefur á verðinum

Er það ekki dæmigert fyrir Alþingi Íslendinga að veita blessuðu barninu íslenskan ríkisborgararétt en hafa þó ekki lögleitt staðgöngumæðrun? Staðgöngumæðrun er hreint ekki sjálfsagt mál og foreldrar barnsins hafa því framið verknað sem ekki er löglegur hér á landi. Þau treysta á að samúðarbylgjan muni brjóta allar hindranir og þar með allar reglur.

-

Staðgöngumæðrun felur í sér að blásnauð kona leigir auðugum hjónum líkama sinn með allri innri líffærastarfssemi í 9 mánuði. En Alþingi hefur bannað með lögum vændi, sem felur í sér að konan leigir karlmanni hluta af líkama sínum í aðeins 11 mínútur að meðaltali, ef marka skal heimsfræg ummæli vændiskvenna.

-

Staðgöngumæðrun er mál sem þolir enga bið. Alþingi hefði átt að vera búið að fjalla um það og taka ákvörðun fyrir löngu. En fallist Alþingi á staðgöngumæðrun kemur ekki annað til greina en aflétta banni á vændi sem er ekkert annað en smámunir hjá staðgöngumæðrun. 

Svíar eiga að skammast sín.

Gott er þegar ríki heimsins gera með sér samkomulag um að framselja glæpamenn hvert til annars, því það torveldar hvers kyns óþokkum að komast undan réttvísinni. En krafa Svía nær ekki nokkurri átt. Það er ekki hægt að hundelta karlmann bara vegna þess eins að tvær stelpuskjátur verða afbrýðissamar og kvarta yfir rifnum smokki. Svíar fara offari í þessu máli og alþjóðasamfélagið á að víta þá fyrir oflætið. Bretar eiga ekki að framselja Assange. Þeir eiga að sleppa honum og segja Svíum að skammast sín. 

Segir Svía undirbúa framsal

Ofbeldisverkin á Austurvelli opnuðu flóðgáttir

Þetta er áhugaverð pæling. Demókratar sjá sér leik á borði og hagnýta sér óhugnanlegan ofbeldisverknað til þess að koma höggi á Repúblikana. Þannig er nú hjartalag stjórnmálamanna. En ofstækisfullt tal um líkamsmeiðingar og aftökur er auðvitað ekki til þess fallið að róa hina örlyndu. Við fengum smjörþefinn af því hér á Íslandi þegar búsáhaldabyltingin reið yfir landið. Munnsöfnuður vinstri manna var ægilegur og aðgerðirnar eftir því ..... blóðsúthellingar og skemmdir á mannvirkjum. Ég spáði því þá að ofbeldisverkin á Austurvelli myndu opna flóðgáttir afbrota og ofbeldis í þjóðfélaginu og sú hefur orðið raunin. Mikil er ábyrgð þeirra manna sem kyntu undir ófriðnum á Austurvelli.

Vill að ofstækismenn svari til saka

Nýr stjórnmálaflokkur á Íslandi?

Okkur bráðvantar svona stjórnmálaflokk á Íslandi. Heita má að það séu síðustu forvöð að stofna svona flokk.......flokk sem ekki vinnur að því að trana fram sínum mönnum og leggja undir sig stjórnsýsluna, heldur flokk sem vinnur dag og nótt að því markmiði að efla vitræna umræðu um þjóðmál.

-

Hver ætti að leiða slíkan stjórnmálaflokk? Mér dettur í hug Jónas Kristjánsson, fyrrum ritstjóri DV, sem gerþekkir þjóðmálin en tilheyrir engri sérstakri stjórnmálahreyfingu. Jónas er þar að auki geysi hugmyndaríkur, orðhvatur og frábitinn vinsældaveiðum. Annar maður, stórfróður um landsmálin, er auðvitað Styrmir Gunnarsson, fyrrverandi ritstjóri Morgunblaðsins.

-

Ég held að þessi flokkur yrði á örskömmum tíma langstærsti stjórnmálaflokkur Íslands og í sérflokki sá besti. 

Nýr stjórnmálaflokkur í Danmörku

Hrossin þagna

Össur Skarphéðinsson hefur valið þeim Lilju, Ásmundi og Atla heldur nöturleg auknefni: hryssan, folaldið og afsláttarklárinn. Lilja hefur margsinnis bent á stórkostlegar veilur í efnahagsstefnu stjórnarinnar. Ásmundur hefur margsinnis bent á svik Vinstri grænna í fullveldismálinu. Nú standa litlu hrossin í höm og kvarta yfir álygum samflokksmanna sinna. Það er dapurlegt að horfa á svo illa meðferð á skepnum en dapurlegra þó að hrossin skuli láta þetta yfir sig ganga, þegar þeim stendur til boða að strjúka úr stóðinu og koma sér fyrir á notalegri stöðum. En þegar á reynir hénast litlu hrossin niður og þagna.

Bregðast við málflutningi Árna Þórs

Bjarni gnæfir yfir gapuxana

Þetta er hárrétt hjá Bjarna Benediktssyni. Þegar aðrir stjórnmálamenn steypa stömpum og ryðja úr sér þvættingnum heldur formaður Sjálfstæðisflokksins sjó. Hann sýnir alltaf öðru hverju sína bestu hæfileika, sem eru skarpskyggni, æðruleysi, stefnufesta og rökvísi. Wikileaks valsar um leynihólf Bandaríkjanna og stelur öllu steini léttara. Bandaríkjamenn hafa fullan rétt til að rannsaka Wikileaks og þá sem þar ráða húsum. Össur Skarphéðinsson og Ögmundur hafa báðir hlaupið á sig en Bjarni Benediktsson, formaður Sjálfstæðisflokksins, stendur keikur og gnæfir yfir gapuxana.

Bandaríkjamenn beita lögum

Hetjuljóminn bliknar

Wikileaks hefur stolið mörg hundruð þúsund trúnaðarskjölum úr gagnageymslum bandarískra stjórnvalda og birt þær á netinu. Þessi skjöl varða allt milli himins og jarðar .....  meðal annars hlægilega kjaftafundi með nautheimskum fulltrúum íslenskra stjórnvalda og afar sérkennilega tilburði Árna Finnssonar náttúrufasista, sem vart geta talist annað en landráð.

-

Wikileaks hefur opnað glufu inn í hin margfrægu, reykfylltu bakherbergi alþjóðastjórnmálanna og það er undarleg veröld sem þar getur að líta. Hvað sem Bandaríkjamönnum kann að finnast er sú innsýn ábyggilega af hinu góða.

-

En Wikileaks verður að þola að þeirra eigin gögn séu skoðuð. Wikileaks brýtur af sér gagnvart mörgum aðilum og verða að þola lítilsháttar mótlæti af þeim sökum. Hetjuljóminn bliknar þegar upplýsingahetjurnar fara í felur og vilja ekki veita upplýsingar um sína eigin starfssemi.

Aðför að tjáningarfrelsinu

Kommastrákurinn alltaf sjarmerandi

Ögmundur Jónasson er síbernskur og þar af leiðandi sjarmerandi. Ég fæ oft þá tilfinningu að hann meini raunverulega það sem hann segir. Það er fágætur kostur á stjórnmálamanni. Nú finnst honum mál Birgittu Jónsdóttur harla sérkennilegt og grafalvarlegt. Ögmundur veit bersýnilega ekkert um twitter. Facebook og twitter eru opinberar vefsíður, lesnar af milljörðum manna. Sá sem skrifar eitthvað á þessar síður öskrar yfir heimsbyggðina. Hafi Bandaríska dómsmálaráðuneytið illan bifur á íslenskum hippaþingmanni sem stekkur út úr þingsölum til þess að berja þinghúsið utan og brjóta rúður, þá er skiljanlegt að þeir vilji skoða yfirlýsingar hennar á twitter. 

-

Þetta mál er á engan hátt sérkennilegt. Það er heldur ekki grafalvarlegt og alls ekki merkilegt. 

„Sérkennilegt og grafalvarlegt“