Náhirðin hatar fyrirtækin

Gömlu kommagrýlunni í stjórnarráðinu hefur löngum verið uppsigað við dugnaðarfólk og alla sem vilja bjarga sér af sjálfsdáðum og án ölmusu úr hennar lófa. Einkum er henni í nöp við það dugnaðarfólk sem stofnar fyrirtæki, veitir öðrum vinnu og gerir Íslandi kleift að halda uppi í rándýru menntakerfi og heilbrigðiskerfi.

Þess er best að minnast stöku sinnum að fyrirtækin í landinu eru fjöregg þjóðarinnar. Við einfaldlega stöndum og föllum með þeim hetjum sem þar leggja dag við nótt til þess að láta endana mætast. 

En náhirð Jóhönnu Sigurðardóttur getur ekki leynt því að gamla kommaeðlið hverfur ekki á einni nóttu. Náhirðin hatar hið frjálsa framtak og ríkisstjórn sem er í eðli sínu fjandsamleg atvinnulífinu verður aldrei farsæl ríkisstjórn.

 

Stjórnendur fyrirtækja andvígir ríkisstjórninni

Athugasemdir

[Sigurbjörg Eiríksdóttir, 29.4.2010 kl. 12:37]

Af einhverjum ástæðum gengur illa að koma atvinnulífinu af stað!

[Jóhann Elíasson, 29.4.2010 kl. 12:52]

Það er ósköp einfalt, þetta lið, sem á að heita að stjórni, gerir ekki nokkurn skapaðan hlut til þess að rekstrarumhverfi fyrirtækjanna sé lífvænlegt þvert á móti virðist allt  vera gert til að gera fyrirtækjunum og heimilunum eins erfitt fyrir og mögulegt er.

[Kristinn Karl Brynjarsson, 29.4.2010 kl. 13:51]

Vandamálið varðandi atvinnuuppbyggingu, er heimatilbúinn vandi stjórnvalda. Burtséð frá skattaálagningarruglinu á fyrirtæki sem berjast í bökkum, þá er stjórnarsamstarfið og samningar tengdir því að draga allt hér niður.

Ef að þingmenn stjórnarflokkana væru ekki bundnari stjórnarsamstarfinu, frekar en eigin sannfæringu, eða raunverulegri stefnu síns flokks, þá væri meirihluti í þinginu fyrir flestar ef ekki allar fjárfestingarhugmyndir sem uppi eru á Suðurnesjunum. Sem og þá auðvitað aðrar fjárfestingar, sem eru í "´pípunum".

Aðkoma Björgólfs Thors að gagnaverinu er kannski aðalmálið "opinberlega", en samt hlýtur það að teljast "vafasöm" aðkoma, þegar að sá aðili sem hefur kannski unnið hvað harðast að þessu máli bakvið tjöldin, heitir Vilhjálmur Þorsteinsson sem hefur tekið þátt í fleiri fjárfestingum með Björgólfi eins og t.d. CCP. Ég tek það fram að ég er hlyntur framkvæmdinni við gagnaverið sem slíkri. En það ber samt að hafa í huga hver þessi Vilhjálmur er. Þessi Vilhjálmur var formaður stýrihóps á vegum Samfylkingar vegna orkunýtingar. Á einhverjum tímum hefðu slík tengsl við stjórnarflokk verið kölluð "einkavinavæðing" í tilfelli gagnaversins.

[Baldur Hermannsson, 29.4.2010 kl. 17:24]

Það er ekki hægt að búast við lækningu ef doktorinn beinlínis hatar sjúklinginn. Í þingflokkum stjórnarinnar eru alltof margir sem er í nöp við frjálst atvinnulíf og einkaframtak yfirleitt. Hver dagur sem þessi stjórn situr að völdum lemur fyrirtækin æ dýpra í svaðið.

[Baldur Hermannsson, 29.4.2010 kl. 17:30]

Silla og Jói, við skulum þakka Kristni Karli fyrir greinargóða umfjöllun. Hann hefur elju til þess að draga fram staðreyndir sem varða málin og skerpu til þess að benda á samhengi hlutanna. Kristinn, haf þó heila þökk og mikinn sóma fyrir þína iðju.

[Sigrún G. (IP-tala skráð) 30.4.2010 kl. 20:14]

Ég þakka Kristni Karli fyrir greinargóða umfjöllun. 

Og þér líka Baldur.  "Það er ekki hægt að búast við lækningu ef doktorinn beinlínis hatar sjúklinginn."  Snilld!

- Því þessa dagana heitir einkavinavæðingin "samvinnuverkefni"

[Baldur Hermannsson, 30.4.2010 kl. 20:18]

Hárrétt Sigrún! En það mun ekki vanta sorgarsvipinn og krókódílatárin þegar sjúklingurinn geispar golunni.

[Ólafur Ingi Hrólfsson, 1.5.2010 kl. 01:05]

Það er eitt ömurlegt við þessi skrif ykkar -

þetta er allt rétt

[Baldur Hermannsson, 1.5.2010 kl. 05:46]

Ólafur, því miður er það bara þannig að svín breytist ekki í hest og kommi verður aldrei annað en kommi þótt hann langi til að vera eitthvað annað.

[Kristinn Karl Brynjarsson, 2.5.2010 kl. 20:50]

Baldur. Hefur þú prófað að setja það inní þína "pólitísku greiningarmaskínu", hvað hefði gerst ef að Samfylkingunni hefði tekist ætlunnarverk sitt í kosningunum 2003, þ.e. að gera ISG að forsætisráðherra?

Ég skal taka ómakið af þinni "maskínu".

Tvennt hefði klárlega gerst með Samfylkingu í stjórn með Framsókn. Lánshlutfall hjá Íbúðalánasjóði, hefði farið yfir 90% og hámark lánsfjárhæðar orðið "stjarnfræðilegt". Enda skammaði Jóhanna Sigurðardóttir Sjálfstæðisflokkinn fyrir að halda aftir af þessu "þjóðþrifaverki" Framsóknar, þ.e. að hækka lánshlutfallið. Fjölmiðlalögin hefðu ekki komið fram. Skattar hefðu lækkað, enda lofaði Samfylkingin því fyrir kosningar. Allar ESBtilskipanir hefðu runnið gagnrýnislaust í gegnum þingið, því að Samfylkingin hefði aldrei fallist á einhverjar takmarkanir hér á ESBregluverkinu, enda ESB og regluverk þess það eina sem blífur í hugarskoti Samfylkingarfólks.

Ætli það megi því ekki allt eins fullyrða að þessu ofansögðu, að nú um stundir væru aðrir flokkar hér við völd og þjóðin á leið út úr kreppunni. En ekki í aðlögunnarferli að því að lifa við kreppu sem varanlegt ástand.

[Baldur Hermannsson, 2.5.2010 kl. 21:15]

Kristinn, þetta eru stórskemmtilegar vangaveltur - en þær eru ekki bara skemmtilegar, því þær eru vendilega studdar rökum og ég trúi því vel að svona hefði farið.

[Kristinn Karl Brynjarsson, 2.5.2010 kl. 21:18]

Staðan gæti jafnvel verið verri en hún er í dag, að því leitinu að "bjölluatinu í Brussel" væri kannski lokið með skelfilegum afleiðingum þjóðina.

[Baldur Hermannsson, 2.5.2010 kl. 21:21]

Það er stórfróðlegt að velta þessu "scenario" vandlega fyrir sér. Partur af því að gera upp reikningana hlýtur að vera sá að skoða hvað valkostirnir hefðu haft í för með sér. Ég hef ekki séð þessar vangaveltur áður, en þær eru lærdómsríkar.

[Kristinn Karl Brynjarsson, 2.5.2010 kl. 21:32]

Það er bara ekki nóg að taka skýrsluna "alvarlega" og draga af henni gagnrýnislausar ákvarðanir.

Það væri þjóðinni einnig nauðsynlegt að skoða "skýrsluna" með gagnrýna hugsun að leiðarljósi, með tíðaranda þess tímabils sem hún spannar.

[Baldur Hermannsson, 2.5.2010 kl. 21:34]

Hjartanlega sammála - skoða hina sögulegu framvindu í samhengi við tíðaranda, pólitískar aðstæður og þá valkosti sem í boði voru. Vonandi tekur einhver snarpur - og HLUTLAUS - sagnfræðingur að sér það þarfaverk.

[Kristinn Karl Brynjarsson, 2.5.2010 kl. 21:36]

Veistu það Baldur að slíkur fræðimaður er eflaust ekki ennþá "kominn í heiminn".

[Baldur Hermannsson, 2.5.2010 kl. 21:39]

Þór Whitehead? Rannsóknanefnd 7 sagnfræðinga? Trúlega yrði þetta ofverk eins manns......

[Kristinn Karl Brynjarsson, 2.5.2010 kl. 21:42]

Já líklega. En slík nefnd yrði ekki skipuð í tíð þessarar ríkisstjórnar.

Ég er að vinna "lengri" útgáfu af þessari sagnfræðigreiningu. Birti hana á eftir á Facebook, en skal senda þér hana sem póst þegar ég hef lokið mér af.

[Baldur Hermannsson, 2.5.2010 kl. 21:44]

Absolútt, ég hef mikinn áhuga á þínum skarplegu greiningum, einkum vegna þess að þú bendir jafnan á áhrifaþætti og samhengi sem öðrum hefur yfirsést.

[Kristinn Karl Brynjarsson, 2.5.2010 kl. 21:52]

Ég er ekki svo sannfærður um að þeir aðilar sem um þetta fjalli yfirsjáist þetta eitthvað.

Ég er frekar þeirrar skoðunnar að þessir aðilar þegi frekar, enda "sökudólgurinn" fundinn.

[Baldur Hermannsson, 2.5.2010 kl. 21:55]

Svo eru menn andlega latir, gleymum ekki þeim þætti mannssálarinnar!

[Kristinn Karl Brynjarsson, 2.5.2010 kl. 21:58]

Já en samt er ekki hægt að væna menn um mistök, nema skoðaðar séu allar hliðar máls og aðrir möguleikar á atburðarrás ígrundaðir.

[Baldur Hermannsson, 2.5.2010 kl. 22:03]

Nákvæmlega, eins er nauðsynlegt í vitsmunalegri umræðu að skilgreina vandlega hugtök á borð við "mistök". Þokukennd hugtök koma alveg í veg fyrir krystaltæra umræðu.

[Kristinn Karl Brynjarsson, 2.5.2010 kl. 22:58]

Greiningin er komin Baldur á Facebook. Lengri útgáfan alltsvo.

[Baldur Hermannsson, 2.5.2010 kl. 23:01]

Frábært, ætlarðu ekki að setja hana hér á bloggið líka?

[Kristinn Karl Brynjarsson, 2.5.2010 kl. 23:05]

Jú eða bara á prent. Ég er í basli með að copy/paste á blogginu,

[Kristinn Karl Brynjarsson, 2.5.2010 kl. 23:10]

Ég held að mér hafi tekist að koma þessu á bloggið.

[Baldur Hermannsson, 2.5.2010 kl. 23:14]

Flott, ég ætla að lesa þetta þar.