Rífandi skemmtilegt viðtal

Alltaf skal Agli Helgasyni takast best upp í tveggja manna tali, og þá sér í lagi þegar hann ræðir við útlenda spakvitringa á borð við Boyes þennan eða Evu Joly. Og ekki skemmir þegar honum gefst tækifæri til þess að hella olíu á elda Davíðshatursins, þá magnast Egill upp í islömskum trúarhita og verður vart maður einhamur.

Þetta var rífandi skemmtilegt viðtal og ég var heppinn að hafa gesti á heimilinu sem inntu eftir Silfrinu, því ég er almennt orðinn leiður á Agli og því stjórnlausa fjasi sem viðgengst í Silfrinu. Roger Boyes sér þjóðlífið með hinu glögga gestsauga, og það er löng hefð fyrir svona lífrænni og dálítið glannalegri fræðimennsku á Bretlandi. Breskur fræðimaður og rithöfundur sagði mér fyrir tveim áratugum að þar í landi þætti skemmtanagildið ekki lítilvægara en fræðagildið, andstætt því sem gerist á Norðurlöndunum, þar sem fræðin þykja því merkilegri sem þau eru leiðinlegri.

Ég ætla að lesa Meltdown Iceland eftir Boyes, en fyrst mun ég ljúka við Umsátrið, sem er ekki síðri fræðibók um bankahrunið. Því fleiri sjónarhorn sem við höfum á þennan ógurlega atburð, því skýrari verður heildarsýnin.

Boyes: Of mikil áhersla á ál

Athugasemdir

[Rafn Haraldur Sigurðsson (IP-tala skráð) 6.12.2009 kl. 16:51]

Mér þótti athyglisvert hvað hann sagði um Jón Ásgeir. Það var allt í lagi með hann. Hann var bara eins og hinir með tölvu á hótel lobby-um. Maður bara spyr sig, ,,Hver pantaði þennan snilling eiginlega."

Allavega var það ekki hann Davíð, svo mikið er víst.

[Gústaf Níelsson, 6.12.2009 kl. 16:57]

Hr. Boyes hefur lagt sig ágætlega eftir því að setja sig inn í íslensk málefni og er það ekki nema eðlilegt af hálfu manns sem ætlar að skrifa um ógæfu smáríkis. Ekki hefur mér gefist tóm til að lesa bók hans en vona að það gefist um jólin. En af viðtalinu má hins vegar ráða að íslenska rógstungan hefur sleikt eyrun á manninum vel og vandlega að innanverðunni og rækilega kom í ljós að íslenskir vinstrimenn eru hvíldarlaust að rægja land sitt og þjóð í útlöndum, jafnt menn sem málefni. En manninum er nokkur vorkunn, hann þekkir ekkert til hér á landi en kann greinilega vel við sig í kjöltu Gróu á Leiti.

[Baldur Hermannsson, 6.12.2009 kl. 17:17]

Rafn, það var skemmtileg lýsing og þá ekki síður að svona eru upparnir á 21. öld, gerandi stórbissniss gegnum fartölvur í anddyrum hótelanna.

[Baldur Hermannsson, 6.12.2009 kl. 17:18]

Gústaf, sá dagur mun aldrei koma að menn verði á eitt sáttir um Davíð Oddsson. Það kom líka fram að Boyes þótti sjálfum nóg um og hann væri kannski að kenna Davíð um alltof mikið. Ég býst við því að það sé fengur að bókinni og hlakka til að lesa hana.

[Hallgerður Pétursdóttir (IP-tala skráð) 6.12.2009 kl. 17:58]

Baldur við erum vinir, sláðu á þráðinn eftir lestur bókarinnar. Sá dagur mun aldrei koma....Samt áttu von á feng?   Krútt

[Baldur Hermannsson, 6.12.2009 kl. 18:07]

Vitanlega slæ ég á þráðinn, það væri nú annað hvort. Já, mér fannst strax fengur í þessu viðtali, kemur ferskt loft með sjónarmiðum greindra útlendinga sem þekkja Ísland og horfa á atburðarásina með öðrum augum en við sjálf. Ég er auðvitað ekki á þeim buxunum að kaupa allt sem hann lætur út úr sér, ég les ekki bækur með slík áform í huga.

[Loftur Altice Þorsteinsson, 6.12.2009 kl. 18:28]

Það er rétt sem þú hefur fregnað Baldur, að í Bretlandi þykir skemmtanagildi viðtala öllu öðru mikilvægara. Að því leyti á Roger Boyes sér marga kviðmága í því landi. Hann er raunar mun þekktari í Þýðskalandi en Bretlandi - fyrir að koma fram í skemmtiþáttum í sjónvarpi.

 

Fyrir nokkrum árum kom út bók eftir Roger Boyes, sem nefndist “Mín kæru kálhöfuð” og vísaði þar til Þjóðverja. Menn geta fundið ýmislegt um bókina á Netinu og meðal annars mun þar ritað:

 

The Germans are a nation of paranoid schizophrenics who can't decide whether to love or loathe themselves…..One minute they're convinced they're total losers and start filling their pants. The next they're fervent patriots who think they know it all. It's completely confusing….

 

Fór ekki Roger Boyes bara mildum orðum um okkur, nema Davíð auðvitað ?

 

[Baldur Hermannsson, 6.12.2009 kl. 18:32]

Hehe, ekki koma menn að tómum kofanum þar sem Loftur er. Þetta var nákvæmlega myndin sem ég fékk af Boyes, rífandi skemmtilegur maður, fyndinn, þessi notalega pöbba-týpa sem er svo algeng á Bretlandseyjum. Maður verður að taka öllu sem hann segir með fyrirvara en það breytir ekki því að hann hefur margt til síns máls. Hvað sem mönnum kann að finnast um Davíð, þá voru lýsingar Boyes á honum fyndnar og talsvert öðruvísi en við eigum að venjast.

[Baldur Hermannsson, 6.12.2009 kl. 18:35]

Loftur, tókstu eftir því hvernig Egill lagði sig í framkróka að fiska upp úr Boyes allt sem neikvætt mátti segja um Davíð? Og á einum punkti hrökk upp úr Boyes: you know him better than anyone.

Þetta tilsvar bendir ótvírætt til þess að þeir hafi rætt áður saman um Davíð Oddsson - sem Egill hatar eins og frumkristnir menn hötuðu djöfulinn - og jafnvel að Boyes hafi sinn vísdóm um Davíð frá Agli sjálfum.

[Eygló, 7.12.2009 kl. 01:20]

Ágæti Baldur. Hvers vegna þarftu að lesa (allar) þessar bækur?  Hvaða heildarmynd ertu að leita að? Hvað ætlar þú svo að gera?

Mér heyrðist Bretinn segja frá alvarlegum atvikum á kíminn en jafnframt kaldhæðinn hátt, - eins og margra Breta er lagið og eins og margur Íslendingurinn kann vel að meta.

[Baldur Hermannsson, 7.12.2009 kl. 03:39]

Ég er alltaf sílesandi bækur. Það er mín tómstundaiðja, einkum á vetrum þegar golfvellirnir eru lokaðir.

[Sigurbjörg Eiríksdóttir, 7.12.2009 kl. 08:01]

Blindur er bóklaus maður.... Kveðja í Fjörðinn.

[Guðlaugur Hermannsson, 7.12.2009 kl. 09:29]

Þetta viðtal er tímamótaviðtal í þessu bankahruni sem við berum ábyrgð á.

[Loftur Altice Þorsteinsson, 7.12.2009 kl. 10:30]

Baldur, ég gat ekki heyrt betur en heldstu heimildarmenn Boyes væru þau Egill og Hildur Helga Sigurðardóttir. Boyes er sams konar slúðrari og þau tvö, þannig að þetta er samhendt og skemmtileg þrenning. Um hagfræði hefur Boyes enga þekkingu, en þau Egill og Helga eru hins vegar sérfræðingar á því sviði eins og allir vita.

 

Tóks þú eftir því Baldur, að þegar kom að níði um Brown og Darling var látin fylgja nauðsynleg skýring ? Þetta eru Skotar og því jafn miklið aular og Íslendingar !

 

[P.Valdimar Guðjónsson, 7.12.2009 kl. 16:46]

Þessi gests augu eru misglögg, en ég er sammála þér Baldur. Viðtalið við Boyes var stórskemmtilegt.    Hann hefur greinilega auga hins þaulvana blaðamanns og fréttaskýranda.  Við fyrstu sýn virðist "sjálfið" heldur ekkert flækjast fyrir sem hendir marga.   

Megin ástæðan fyrir því  hve Agli Helgasyni tekst vel til í sínum viðtölum er hve hann er slakur sjálfur og sýnir eðlileg og óþvinguð svipbrigði.  Það gerir viðmælandann öruggann.   Í þau fótspor fara fáir í hópi íslenskra sjónvarpsmanna.(Samt varla hópur lengur)  

[Baldur Hermannsson, 7.12.2009 kl. 16:50]

Valdimar og Loftur, líklega hefur þessi samtalsþáttur verið svona líflegur vegna þess að þarna voru þeir að tala saman: höfundurinn og helsti heimildamaðurinn.