Sorglegustu ummæli dagsins

Þetta eru sorglegustu ummæli dagsins. Maðurinn sem heimtaði þjóðar atkvæðagreiðslur á færibandi þegar hann var í stjórnar andstöðu leggst núna gegn skýlausri réttlætiskröfu þúsundanna. Auðvitað eigum við að kjósa um þennan Icesave-samning. Kannski verður hann samþykktur, annars fer hann bara í dóm.

Svo þegar dómur er fallinn getum við kosið um hvort skynsamlegt sé að una dómnum eða ekki. Þannig getum við kosið um Icesave næstu árin ef svo ber undir og að lokum verður upphæðin orðin hverfandi og gleymist.

Alltaf skal maður finna smá ljóstýru í myrkrinu ef lengi er leitað.

Styður ekki þjóðaratkvæði um Icesave

Athugasemdir

[Helgi (IP-tala skráð) 15.2.2011 kl. 15:58]

Sæll.

Þessi ummæli hans koma ekki á óvart, hann veit sem er að þessi samningur verður felldur í þjóðaratkvæðagreiðslu og það óttast hann, og fleiri í stjórnmálaelítunni, því það væri í enn eitt skiptið sem hann fengi gula spjaldið frá þjóðinni. Við skulum ekki gleyma því að þessi sami maður spáði að illa færi fyrir okkur ef við samþykktum ekki í fyrra. Engin af hans varnaðarorðum hafa ræst. Þessi sami Steingrímur sagði í fyrra að hagvöxtur væri hér en svo kom í ljós að samdráttur var. Laug maðurinn til um hagvöxtinn eða vissi hann ekki betur?

Í fréttinni segir hann líka að " . . . Icesave-málið stæði í vegi fyrir endurreisn efnahagslífsins og mikilvægt væri að ljúka málinu. " Þessi ummæli sýna greinilega hve lítið vit Steingrímur hefur á efnahagsmálum. Hvernig geta 50 -250 milljarðar sem við þurfum ekki að borga ofan á núverandi skuldasúpu komið efnahagslífinu af stað aftur? Skilur maðurinn ekki að lán þarf að borga til baka með vöxtum? Er þetta ekki 2007 hugsunarháttur? Það fé sem við greiðum Bretum og Hollendingum vegna þessarar vitleysu Steingríms og fleiri fer augljóslega hvorki í mennta- eða heilbrigðiskerfið svo dæmi sé tekið. Í ár borgum við 74 milljarða í vexti og afborganir og þeim sem styðja Icesave finnst allt í lagi og við borgum enn meira?! Málið snýst um það hvort fólki finnst í lagi að lífskjör í landinu verði bág næstu árin og áratugina vegna ólögvarðra krafna Breta og Hollendinga (þessar þjóðir stofnuðu til ákveðinna útgjalda sem koma okkur ekkert við). Hvernig stendur á því að þingmenn virðast ekki hafa í huga það sem Ólafur Margeirsson (á pressan.is) hefur bent á um líklegt þjóðargjaldþrot okkar?

Höfum í huga að tilskipanir ESB segja beinlínis að ekki sé ríkistrygging á innistæðutryggingasjóðnum. Ef svo væri hefði ESB ekki breytt tilskipunum nýlega þannig að nú á að vera ríkistrygging á innistæðutryggingastjóðnum. Alan Lipietz, sem er höfundur þessa regluverks, sagði í Silfri Egils í fyrra að við ættum ekki að borga skv. þessum reglum. Fyrir því eru rík samkeppnissjónarmið að ekki sé ríkisábyrgð á innistæðutryggingasjóðnum og út í þau fer ég ekki hér þannig að þessi breyting ESB er röng.  Sigurður Líndal sagði í fyrra að Alþingi hefði ekki heimild til að samþykkja svona óljósa heimild um útgjöld úr ríkissjóði. Gilda þau rök ekki enn um þennan samning? Eru 50-250 milljarðar ekki óljós upphæð? Skiptir það einstakling ekki gífurlega miklu máli hvort hann þarf að greiða 50 þúsund kr. eða 250 þúsund krónu reikning?

Þó svo þessi samningur sé hagstæðari en sá fyrri breytir það engu um að hér er um að ræða kröfur sem engin lagabókstafur styður. Það er kjarni málsins. Upphæðin breytir engu um það. Svo skulum við heldur ekki gleyma því að skv. ESB reglum eiga Bretar og Hollendingar að stefna íslenska ríkinu fyrir íslenskan dómstól. Íslenskir dómarar munu án efa sjá þegar þeim er bent á það sem að ofan er nefnt að þessar kröfur eru með öllu löglausar.

Hvernig stendur annars á því að þorri stjórnmálamanna er svona ósammála almenningi? Hvers vegna ganga þeir erinda erlendra þjóða en ekki sinna þegna? Hvers vegna finnst þeim í lagi að lífskjör almennings verði verri vegna Icesave en þau gætu verið án Icesave? Hvers vegna standa þeir ekki fast á lögvörðum rétti okkar? Hvers vegna vilja þeir ekki að lífskjör Íslendinga verði eins góð og hugsanlegt er? Hvers vegna skoða þeir ekki eigin málflutning þegar í ljós hefur komið að allt sem þeir sögðu í fyrra til að hræða fólk til að samþykkja samninginn hefur ekki ræst? Kúba norðursins? Af hverju ættum við að trúa einu orði sem frá þessum mönnum kemur nú? Hvernig stendur á því að "ískalt hagsmunamat" sumra er svona rangt? Hvernig stendur á því að þingmenn virðast ekki þekkja vel til staðreynda þessa máls? Ekki verður séð að þeir almennt séð viti það sem að ofan var rakið.

Af hverju leitar Landsvirkun ekki til annarra banka en þessarar blessuðu byggðastofnunar ESB (en það eru ein rökin fyrir því að greiða Icesave svo við fáum lán í Búðarhálsvirkjun og komum þar með hjólum atvinnulífsins af stað)? Af hverju ættu erlendir bankar ekki að fjármagna arðbæra framkvæmd (t.d. kínverskir bankar en þeir eru fullir af peningum)? Af hverju má ekki t.d. leita til banka landa sem flytja út olíu en þau lönd standa væntanlega flest vel vegna hás olíuverðs.

Af hverju spyrja fréttamenn stjórnmálamennina ekki spurninga líkt og þeirra sem ég set fram hér að ofan?

[Baldur Hermannsson, 15.2.2011 kl. 16:01]

Þakka þér fyrir geysi skeleggan pistil, Helgi. Þessi pistill er alger múrbrjótur.

[Tómas (IP-tala skráð) 15.2.2011 kl. 23:17]

Steingrímur hlýtur að vera einn vitgrannasti maður allra tíma. Og það segi ég ekki honum til álösunar, heldur okkur hinum, sem greinilega þurfum að horfast í augu við okkur sjálf, og passa okkur að vanda betur valið á þeim sem við kjósum til valda, að dæma menn eftir einhverju raunverulegu, ekki hysmi og tómum orðum sem ekkert fylgir...sama hvað þeir þykjast standa fyrir.

Hvernig getur maðurinn, sem barðist svo mjög fyrir að Svavarssamningurinn yrði samþykktur, og játaði sig svo sigraðan af þjóðinni, og sparaði sá sigur þjóðarinnar milljarða á milljarða ofan......nú farið fram með nákvænlega sama söng, nákvæmlega, nákvæmlega sama svipinn, í nákvæmlega sama anda, jafn fullviss um að hann sé alvitur en þjóðin safn fífla. Á svona maður að hafa völd í lýðræðisríki? 

Þetta er sorglegt og við skulum passa okkur að endurtaka aldrei þau mistök að kjósa vanvita. Og meðan við höfum ráðrúm til. Förum á http://www.kjosum.is  !!!!!

Baráttukveðjur, 

fyrrum kjósandi Steingríms.

[Helgi (IP-tala skráð) 16.2.2011 kl. 09:48]

@Tómas:

Það er gott að sjá að þú og sennilega fleiri eruð farnir að sjá hvernig málum er háttað hjá Steingrími. Það er í lagi að gera mistök á meðan menn læra af þeim og þá má segja sem svo að þau séu jafnvel af hinu góða. Mikilvægt er, eins og þú gerir, að stjórnmálamenn komist ekki upp með eitthvað rugl án þess að fylgið reitist af þeim. Ég t.d. kýs ekki Sjálfstæðisflokkinn (sem mér finnst í raun vera miðjuflokkur) aftur með liði eins og Bjarna, Þorgerði og fleirum slíkum innanborðs. Það er ekki í lagi að segja eitt en gera svo annað!!! Menn fá atkvæði út á það sem þeir segja og þeir sem kjósa að fara á bak orða sinna eiga að missa atkvæði - helst sem flest. Bjarni getur átt sitt kalda hagsmunamat. Svo er þetta lið auðvitað skíthrætt við að leggja verk sín í dóm kjósenda. Svona fólk á að snúa sér að einhverju öðru.

Við skulum taka vel eftir því hverjir samþykkja Icesave III á þingi og EKKI gleyma því vegna þess að þetta fólk á ekki að komast upp með að gera svona rosaleg mistök án þess að taka afleiðingum þeirra.

[Baldur Hermannsson, 16.2.2011 kl. 09:56]

Ég tek undir með Helga ..... það er eitthvað fallegt við það þegar fólk sér að það hefur villst af leið en hefur kjark til þess að viðurkenna mistökin og breyta um stefnu.

[Víkingurinn (IP-tala skráð) 16.2.2011 kl. 20:49]

Sammála! Falleg umræða! Batnandi manni er best að lifa, og batnandi þjóð líka. Þess vegna skulum við ekki leggjast í kör sem skuldaþrælar og deyja heilaþvegin af áróðursröddum um að baráttan sé fyrirfram töpuð! Ó, nei! Við erum víkingar!!! Íslenska þjóðin skal lifa og þess vegna segi ég þetta:

Eigi skal eyða tíma í að væla, heldur safna liði og kjósa....NÚNA ....á http://www.kjosum.is ! :)

[Baldur Hermannsson, 16.2.2011 kl. 21:18]

Víkingur, ég er búinn að skrá mig á þann göfuga vef.