RÚV ætti að endurskoða þessa ákvörðun

Ástþór og Borgarahreyfingin hafa nú þegar fengið ærin tækifæri til þess að kynna sig í sjónvapinu. Þessi framboð hafa fengið inni í kjördæmaþáttunum. Þar hafa þau lagt fátt eða ekkert áhugavert til málanna. Raunar hafa þau verið heldur til vansa og spillt umræðunum. Frambjóðendur þeirra hafa ítrekað hunsað spurningar þáttastjórnenda og vaðið elginn aftur á bak og áfram með sleggjudómum og gífuryrðum svo raun var á að hlýða.

Það breytir ekki þeirri staðreynd að við búum við lýðræði og ný framboð verða að fá tækifæri til þess að kynna sig. Jafnvel bjánarnir búa við málfrelsi. RÚV ætti að endurskoða þessa ákvörðun. Slík kynning þarf alls ekki að vera á besta áhorfstíma. Þau framboð sem ekki kæra sig um að nýta tilboðið eiga ekki að koma í veg fyrir að hin fái það.

Segja þaggað niður í nýjum framboðum

Athugasemdir

[Steinar Immanúel Sörensson, 17.4.2009 kl. 16:48]

já þetta er með ólíkindum - nýju framboðin fá ekki fjármagn til að koma sér á fót eins og þau gömlu, þessu komu gömlu flokkarnir á til þess að verja rassgatið á sjálfum sér, og þegar talað er um að allir flokkar fái 10 mín kynningu sem væri auðvitað sanngjarnt, þá setja gömluflokkarnir sig upp á móti þvi til þess að verja rassgatið á sjálfum sér.

 þetta er ruddalegt - og siðlaus framkoma

[Baldur Hermannsson, 17.4.2009 kl. 16:55]

Mér finnst nú orka tvímælis að moka peningum í einhverja gaura bara af því að þeim dettur í hug að fara í framboð. Menn sem taka sjálfa sig alvarlega skjóta saman í sjóð til að standa straum af kostnaði. En það verður að gefa framboðum kost á því að kynna sig. RÚV hlýtur að vera rétti vettvangurinn til þess.