Siðleysi og grimmd bankastarfsmanna

Þetta er óhugnanleg frásögn. Siðleysi og grimmd bankastarfsmanna er með ólíkindum. Ég hef áður greint frá því þegar starfsmaður Kaupþings hringdi heim til mín í tvígang og reyndi að svíkja til sín sparifé konu minnar. Sem betur fer er hún Jóna mín klókari en ég. Ég hneigist alltaf til þess að trúa fólki nema það sé vinstri sinnað, þá veit ég auðvitað  að það er ginkeypt fyrir lygum og  þvælu og er á verði. En Jóna lítur á bankamenn sem glæpalýð og hunsaði gylliboðin, sem vitaskuld reyndust fals og fláræði.

Páll Vilhjálmsson, sem er einn af bestu bloggurum landsins, er með stutta lýsingu á kattarþvotti Fréttablaðsins í dag. Það margborgar sig að fylgjast grannt með bloggsíðu Páls Vilhjálmssonar. Hann segir:

"Ef Fréttablaðið væri eitt um að segja frá hrunskýrslunni myndu lesendur halda að bankakreppan væri vegna stjórnvalda."

Sjá nánar blogg Páls.

Reynt að blekkja viðskiptavini bankanna

Athugasemdir

[Viðar Friðgeirsson, 13.4.2010 kl. 12:30]

Sæll Baldur. Það hafa margir sömu sögu að segja og þú og hún Jóna þín og margir létu glepjast. Á vordögum 2008 gerðu þessir menn innrás á mitt heimili  til að komast yfir fjármuni sem voru á nafni konu minnar á svokölluðum hávaxtareikningi. Buðu henni gull og græna skóga ef hún léta þá hafa þessa aura sem hún hafði nurlað saman af fátæklegum launum sínum. Um var að ræða þjónustufulltrúa frá aðalbanka, ekki okkar þjónustufulltrúa í okkar útibúi og einmitt í þessum dúr. Sérstakt tækifæri fyrir hana persónulega að fá miklu betri díl við bankann.

Hún vísaði á mig en aldrei var haft samband við mig út af þessu heldur herjað á hana aftur og aftur. Ég fór þá að hugsa; Hvers vegna vill bankinn endilega að við förum að græða meira á viðskiptunum og það á hans kostnað? Komst að þeirri niðurstöðu að hér væri eitthvað skrítið á ferðinni og hafnaði þessu góða boði. Sá svo auðvitað um haustið þegar spilaborgin hrundi hvað lá að baki.

[Baldur Hermannsson, 13.4.2010 kl. 12:38]

Lærdómsrík frásögn, Viðar. Verst er til þess að hugsa að þetta hyski sem á okkur herjaði voru engir stórbokkar, þetta voru almennir starfsmenn sem vissu vel hvað þeir voru að gera okkur. Ég þekki sjálfur fólk sem lét glepjast og glataði sparifé sínu, venjulegt vinnandi fólk sem ekki mátti við miklu, og ég hefði látið glepjast sjálfur ef því hefði verið að skipta.

[Heimir Lárusson Fjeldsted, 13.4.2010 kl. 12:49]

Mikið áttu gott Baldur að vera kvæntur henni Jónu. Svo hefur þú Pál Vilhjálmsson ykkur hjónum til halds og trausts. Vel settur maður Baldur.

[Guðmundur Pétursson, 13.4.2010 kl. 14:04]

Það var skelfilegt siðleysi sem ríkti í bönkunum.  Þarna voru vanhæfir aðilar sem stjórnuðu sem höfðu græðgina og eigin hagsmuni að leiðarljósi.  Það sorglegasta er að þeir eru flestir ennþá við stjórn bankana. 

[Baldur Hermannsson, 13.4.2010 kl. 14:29]

Heimir, margur er auðugri en hann telur sig vera :)

[Baldur Hermannsson, 13.4.2010 kl. 14:30]

Guðmundur, verst af öllu vondu er sú hrikalega staðreynd að þessir menn voru hreint ekki vanhæfir. Þetta var upp til hópa vel greint fólk og vel menntað í frægum skólum innan lands og utan. Nei hæfnina vantaði ekki. Það vantaði hins vegar allt annað.

[Guðmundur Pétursson, 13.4.2010 kl. 15:08]

Þetta var/er vel menntað fólk en kannski frekar einsleitur hópur.   Stærðfræði/verkfræði menntun er ágæt í sjálfu sér og það er nauðsynlegt en ekki nægjanlegt skilyrði að vera þokkalegur í stærðfræði til þess að geta sinnt starfi sérfræðings eða stjórnanda í banka.  En það þarf líka að vera góður mannþekkjari, sálfræðingur, heimspekingur, góður í póker og skák og ekki er verra ef  menn eru lífskúnsterar og slarkfærir kokkar sem kunna að krydda sinn mat með salti og pipar en ekki gulli og silfri.

[Baldur Hermannsson, 13.4.2010 kl. 15:26]

Þetta er gríðalega djúpt hugsað og viturlega talað, verð ég að segja. Einkum hugnast mér vel að heyra þetta með skákina. Í bankann eiga að veljast menn sem velja Sikileyjarvörn en forðast Traxler-gambítinn.

[Guðmundur St Ragnarsson, 13.4.2010 kl. 17:00]

Páll hittir naglann á höfuðið með Fréttablaðið. Í dag eru allavega 2 myndir af Davíð Oddssyni. Það er einni fleiri mynd en af Jóni Ásgeiri bara svo maður taki dæmi.

[Baldur Hermannsson, 13.4.2010 kl. 18:14]

Guðmundur, þessi skemmtilegi samanburður hittir beint í mark!